معتقدات

معتقدات

...

* اذا انكسرت كاسة بيقولوا: انكسر الشر

(تقولوا الشر مخلوق من الزجاج)

* اذا مر حدا فوق الطفل بيقولوا ما بقا يطول!

( انو اذا طفل صغير متسطّح ما بصير حدا يمر من فوقوا ليشششش ؟ لان ما بعود بيطول الولد بيطلع قصير؟؟!!!)

* قص الاظافر بالليل مو منيح

(ولما بتسأل ليش ؟ بيقولولك مو منيح و خلص ، ياسيدي مو منيح . . مو منيح )

* رش المي فراق

(ما بصير حدا يرش رفيقو بالمي لان بعدين بيتفرقوا وكأنوا عم يرشو بزيت الكاز )

* ياللي بيفوت على بيت جديد بيفوت معه عرق اخضر و مقص و مصحف و يدخل بالرجل اليمين!

(واللي بيعمل غير هيك بيتحول لسعدان !!)

* اذا اجت الكندرة فوق الكندرة يعني رايحين مشوار

(واذا اجت تحتها يعني راجعين من المشوار ؟؟)

*اذا طنت ادنك اليمين حدا عم يحكي عنك بالمنيح و اذا طنت اليسار معناها حدا عم يجيب سيرتك بالعاطل

(واذا طنوا مع بعض معناها طرشت و الله يعوض عليك)

* اذا كان في خناقة بيقولوا اقلبوا الصرامي لتحمى الخناقة

(شماته ) والله لا يشمت حدا فينا!..

* اذا رفت عيني اليمين بيكون جايينا خبر طريف
*اذا رفت عيني الشمال بيكون جايينا خبر مو منيح

(اما اذا رفوا التنتين سوى فأنت اكيد حاتصير أحول)

* اذا حكني حاجبي اليمين معناها بدنا نستقبل حدا جاي من السفر
*أما اذا حكني حاجبي الشمال معناها بدنا نودع حدا بدو يسافر

*إذا حكني كفي اليمين معناها بدي أقبض مصاري
*و إذا حكني كفي اليسار معناها بدي أدفع مصاري

(اما اذا حككوك كلهن أو أي شي تاني بقى فأنت اكيد جربان

ولازم تروح الحمام)

*و ما بينفع كب المي بالبلوعة بالليل من غير التسمية بالله و الاستعاذة أولاً!..
•
(يالطيف مشان ما يؤذونا ولا نأذيهن بس عرفتوا مين هدول؟؟.)

*و دلق القهوه كمان رزقه!

(وكمان نفس الحكي خليها موسخه وما تنظفها!..)

*و شرب المي بعد القهوة قلة زوء

(حتى لو اتشردقت!.. موت ولا تشرب مي!.. )

*و اذا الولد الصغير ابن شهور عم يضحك لحالو بيقولو الملايكه بتكون عم تحاكيه!..

بس ما حدا بيعرف بيشو عم تحاكيه!..

* وإذا الطفل قعد بالصينية وهي عالأرض بيرتعبوا لأنه هاد الولد رح يضيع (ويمكن يتشرد هذا اذا ما طلع حرامي كمان )

* و كمان إذا حدا صبلك شاي او قهوة وملى الفنجان كتير بكون قلبو مليان منك واذا صبها ناقصة هدا دليل على انو هالشخص ناقص

(خلصونا بقا خلصــونا....)

*واذا خايف من عين اتصيبك جيب ورقة واكتب عليها اسم الشخص الي خايف من عينو وغزها بالدبوس وانت عم تقراء المعوذات وتقول من عين فلان و تنفخ...

(وفي حل تاني انك تروح تشيل عيونه وبلا وجعة راس!)

*والي بيعدّ النجوم بيطلعلو تالولات بايدو

(خود بقى)

*وبعد ما نخلص من الصلاة نطوي السجادة مشان الشيطان ما يصلي عليها

(خلّيه يصلّي ياسيدي يمكن بيتوب ويصير يوسوسلنا بالخير!!!!!)



(بيناتنا) :
تستخدم للتشويق او مفتاح للدس والنميمة

(مالك عليي يمين) :
بداية لكذبة من العيار التقيل لاتنزل بميزان او قبان

(وحياتك عالغالي) :
دعوة مبطنة لقصف عمر المتلقي

(بدك الحق وللا ابن عمه) :
اعتراضية لتمرير كذبة بالحجم العائلي وبحرفية عالية

(الك وللا للديب)
: لتحريض النخوة ،وتهيئة المستمع نفسيا لدفع دين او حاجة

(يامرحوم البي) :
يجوز استخدامها كموسيقى تصويرية وزيادة جرعة الاثارة واستدرار المشاعر

(مالك بالطويلة) :
فاصل منشط محشور ضمن حكاية اطول من حكاية ابي زيد الهلالي

(محسوبك) :
للمنفخة والاستعراض

(انسى الموضوع) :
ضوء اخضر لفضح المنمى عليه بكافة وسائل الاتصال المتاحة

(الله يستر عليها):
لازمة في نهاية كل وصلة لفضح بنات الحارة وصديقاتهن وقريباتهن

(سيدي ماعلينا):
شارة معتمدة في نهاية مسلسل نميمة اطول من المسلسلات التركية

(مع احترامي الك):
تعني يا...... بس بطريقة مهذبة

(اشتهيناك معنا):
للنكاية،ويجوز استخدانها بدلا من (متل قلتك) او بالناقص منك

(اخ لو كنت معك) :
برغي سن بعزقة فوق الكم اللي اكلو

(انت لسا مابتعرفني) :
تستعمل للمداراة على البهدلة او سواد الوجه

(ماكذبتلك خبر):
التأكيد على كذبة متوسطة المدى

(اعرف مع مين عمتحكي):
تهديد منتهي الصلاحية لاشباه المسؤوولين وانصاف المدعومين

كتير حلو بس كأنو هذا من القاموس المعضماني